Академиялық лицейлер ҳәм кәсип-өнер колледжлери оқыўшыларының улыўма билим бериў пәнлери бойынша республика олимпиадасының iv басқышында карақалпақстан республикасы командасы үшинши орынды

Академиялық лицейлер ҳәм кәсип-өнер колледжлери оқыўшыларының улыўма билим бериў пәнлери бойынша республика олимпиадасының iv басқышында карақалпақстан республикасы командасы үшинши орынды 

 

Жаңалаў, терең билимге ийе болған жоқары қәнийгели кадрларды таярлаў менен бир қатарда, Ўатанды сүйиўшилик, инсаныйлық, миллий ҳәм улыўма инсаныйлық қәдириятлар руўҳында тәрбияланған, алдыңғы дүнья қарасқа ийе, ғәрезсиз пикирлеўши бәркамал инсанларды қәлиплестириў тийкарғы ўазыйпа етип белгилеп берилген.

Ғәрезсизлик жылларында елимизде билимлендириў тараўын жаңалаў, сол тийкарда нәтийжели миллий моделди қәлиплестириў, ҳәр тәреплеме саламат ҳәм бәркамал әўладты тәрбиялаў бойынша әмелге асырылған кең көлемли жумыслар, ерисилген жетискенликлер пүткил дүнья көлеминде жақсы баҳаланбақта ҳәм толық қоллап-қуўатланбақта.

Биз ушын ең уллы ҳәм муқаддес сәнелерден бири болған Ўатанымыз ғәрезсизлигиниң 26-жыллық байрамын белгилеў қарсаңында Академиялық лицейлер ҳәм кәсип-өнер колледжлери оқыўшыларының улыўма билим бериў пәнлери бойынша Республика олимпиадасының IV басқышы өткизилди.

Усы қысқа дәўирде бир ғана орта арнаўлы, кәсип-өнер билимлендириў системасында 1550 ден зыят академиялық лицейлер ҳәм кәсип-өнер колледжлери шөлкемлестирилип, оқыўшылар ушын терең билим алыў, өзлери қызыққан кәсиплерди таңлаў, кәсиплик қәнийге ҳәм көнликпелерди ийелеў имканияты жаратылды.

Ҳүрметли Президентимиз тәрепинен жасларымызға билдирилип атырған ғамхорлық ҳәм итибарға жуўап ретинде оқыўшыларымыз дүнья көлеминде түрли көрик таңлаў ҳәм халық аралық олимпиадаларда жоқары нәтийжелерди қолға киритпекте.

Атап айтқанда, 2017-жыл 12-18-январь күнлери Алмата қаласында математика, физика, информатика пәнлеринен 13-халық аралық Жаутыков олимпиадасында қатнасқан оқыўшыларымыз 1 гүмис (математика), 2 бронза (физика ҳәм информатика) медалларын қолға киргизди.

2017-жыл 23-29-апрель күнлери Астана қаласында өткизилген 51-халық аралық Менделеев олимпиадасында оқыўшыларымыз 3 бронза медалы ийеси болып, муқаддес Өзбекистанымыз байрағын бәлентке көтериўге мияссар болды.

2000-жылдан берли Өзбекистан командасы қурамында халық аралық пән олимпиадаларында жәми 284 оқыўшы қатнасып, олар 6 алтын, 32 гүмис, 87 бронза медаллары ҳәм 40 қа жақын дипломларды қолға киргизген.

Академиялық лицейлер ҳәм кәсип-өнер колледжлери оқыўшыларының улыўма билим бериў пәнлери бойынша Республика олимпиадалары Өзбекистан Республикасының «Билимлендириў ҳаққында» ҳәм «Кадрлар таярлаў миллий дәстүри ҳаққында»ғы Нызамлары, Министрлер Кабинетиниң 2008-жыл 13-октябрьдеги «Өзбекистан қәбилетли жасларды сыйлықлаў ҳәм материаллық хошаметлеў ҳаққында»ғы 226-санлы қарары, Әдиллик министрлигинен 2009-жыл 2-июньде 1962-сан менен мәмлекетлик дизимнен өткерилген «Академиялық лицейлер ҳәм кәсип-өнер колледжлери оқыўшыларының улыўма билим бериў пәнлери бойынша Республика олимпадаларын өткериў ҳәм халық аралық пән олимпиадалары қатнасыўшыларын таңлаў ҳаққындағы Нызам» тийкарында қәбилетли оқыўшыларды анықлаў, қоллап-қуўатлаў айрықша қәбилетлерди жәнеде раўажландырыў, оларды хошаметлеў мақсетинде Жоқары ҳәм орта арнаўлы билимлендириў министрлигиниң Орта арнаўлы, кәсип-өнер билими орайы ҳәмде Министрлер Кабинети жанындағы Мәмлекетлик тест орайы менен биргеликте өткизиледи.

Республика пән олимпиадасы Нызамға муўапық 4 басқышта өткизиледи:

а) 1-басқыш – оқыў орны бойынша;

б) 2-басқыш- район, сондай-ақ аймақлары районларға бөлинбеген қала бойынша;

в) 3-басқыш – ўәлаят бойынша, сондай-ақ Қарақалпақстан Республикасы ҳәм Ташкент қаласында;

г) 4-басқыш Республика бойынша.

Пән олимпиадасы 15 улыўма билим бериў пәнлеринен өткизиледи.

Пән олимпидасының биринши басқышында академиялық лицейлер ҳәм кәсип-өнер колледжлериниң барлық оқыўшылары қатнасыўы мүмкин, барлық кейинги басқышларда тек ғана алдыңғы басқышларда 76-100 балл топлаған ҳәмде 1-, 2 – ҳәм 3 – орынларды ийелеп, жеңимпаз болған оқыўшылар қатнасады.

Олимпиаданың III  Республика басқышында 3633 оқыўшы қатнасты, ал III  басқышы қатнасыўшылары арасынан жеңимпазлықты қолға киргизген 343 ең қәбилетли ҳәм билимли оқыўшылар олимпиаданың  IV Республика басқышына қатнасты.

Олимпиаданың 4-басқышы белгиленген тәртипке муўапық 2 түрде – жазба ҳәм тест сынаўлары көринисинде өткизиледи.

Олимпиаданың 4-басқышы 2017-жылдың 31-май – 3-июнь күнлери Ташкент қаласында болып өтти. Оған Қарақалпақстан Республикасынан 27 оқыўшы қатнасты.

Қарақалпақстан Республикасында Қарақалпақ тили ҳәм әдебияты пәнинен өткизилген (зоналық) олимпиадада 3 оқыўшы (1-орынды Нөкис педагогика колледжи оқыўшысы Узақбаева Патима 95,75 балл менен, оқытыўшысы  Алламбергенова Гулчеҳра, 2-орынды НМПИ қасындағы академиялық лицей оқыўшысы Жолдасбаева Бибихадиша 90,25 балл менен, оқытыўшысы Байназарова Гулжайна, 3-орынды ТашПМИ Нөкис филиалы қасындағы академиялық лицей оқыўшысы Мамбетниязова Меҳрибан 85,5 балл менен, оқытыўшысы Бектурсынова Гаухар) жеңимпаз болды.

Олимпиаданың IV Республика басқышында математика пәнинен ҚМУ қасындағы академиялық лицей 3-курс оқыўшысы Абдиғаниев Давранбек 85,35 балл менен 3-орынды(оқытыўшысы Жакаева Кенжегул)  ийеледи.

Олимпиада процессин әдиллик тийкарында өткерилиўин тәмийнлеў мақсетинде төрешилер қурамы ҳәм апелляция комиссиясы қурамы Орта арнаўлы, кәсип-өнер билими орайы, Министрлер Кабинети жанындағы Мәмлекетлик тест орайы, Халық билимлендириў министрлиги, жоқары оқыў орынлары ректорларының усыныслары тийкарында Мәмлекетлик тест орайы, Пәнлер академиясы институтларының жетекши алым-педагоглары, жоқары ҳәм орта арнаўлы, кәсип-өнер оқыў орынлары ҳәм улыўма билим бериў мектеплериниң жетекши профессор-оқытыўшыларынан қәлиплестирилди.

IV басқыш жуўмағы бойынша, жәми 15 пәннен 34 жеңимпаз оқыўшылар анықланды (13 оқыўшы 1-орын, 11 оқыўшы 2-орын ҳәм 10 оқыўшы 3-орын).

Командалар есабында Наўайы ўәлаяты ҳәм Ташкент қаласы 6 сыйлықлы орын менен 1-орынды, Бухара ўәлаяты 5 сыйлықлы орын менен 2-орынды, Самарқанд, Наманган ўалаятлары ҳәм Қарақалпақстан Республикасы 4 сыйлықлы орын менен 3-орынды ийелеўге еристи.

Соны айрықша айтып өтиў керек, бүгинги олимпадада еки әўлад ўәкиллери ушырасып атыр: бириншиси өзиниң пүткил өмирин пәнге ҳәм ислеп шығарыўға арнаған, ақыл-санасы, айрықша қәбилети, машақатлы мийнети менен Ўатанымыз илим-пәниниң раўажланыўына  мүнәсип үлес қосқан алымларымыз ҳәм устазларымыз болса, екиншиси барлық имканиятлар жаратылған жаңа түрдеги оқыў орынларында билим алып атырған, журбасшымыз тәрепинен көрсетилип атырған итибар ҳәм шәрт-шәраятлардан үнемли пайдаланып атырған жас әўлад болып есапланады.

Олимпиадада пәнлерден 1-, 2- ҳәм 3-орынларды ийелеген орта арнаўлы, кәсип-өнер оқыў орынларының 3-курс оқыўшылары Министрлер Кабинетиниң 2008-жыл                 13-октябрьдеги «Өзбекистан қәбилетли жасларын сыйлықлаў ҳәм материаллық хошаметлеў ҳаққында»ғы 226-санлы қарарына муўапық жоқары оқыў орынларына тест сынақларысыз ҳәмде қосымша имтиханларсыз кириў имканиятына ийе болды.